وهم الحوار الحضاري و التشلاظ الثقافي

اهلا و سهلا العشران و العشيرات لبارح شفت بلي عندي متابعين من ميريكان و السويد ياختشي وصلت للعالمية بهاد المناسبه كنسلم على الفايكنغ و sabaton و التيتيز و سائر الشعب السويدي الشقيق ،و أناشد من يقرؤون هرطقاتي فالسويد يبانو باش نسيفط ليهم كعب غزال ،بانو بانو راه سيدي ربي قال لينا و تعارفوا ،اجيو نديرو نكاح الثقافات ،المهم ليوم غنهضر على التعددية الثقافية و حوار الحضارات و شلاظة ديال الشعوب ،على بركة الله نبداو نصبو الطاجين سيدتي ،المهم من بين الصور الشائعة عند آكلي الخس (النباتين) و الثذيات المتخلفة (الفيمينست) و المدافعين عن حقوق الدلافين (ملقيتش ليهم الوصف) صورة ديال خمسة ديال الأيادي متشابكة كل يد فلون أملا في عالم يتعايش فيه الأبيض و الأسود و الخوخي و البرقوقي ،و المسلم حدا اليهودي و كلنا لابسين الأبيض و ضاحكين و شي أحلام فاازكة تنتمي لكوكب زمردة و فيها الريحة ديال الحلم العربي ،باختصار احلام غير واقعية ،صراحة تانا فاش كنت مراهقة كنت مهتمة بل intercultural communication و ل cultural diversity و مكنتش كنفرق بيناتهم المهم، شي حاجة فيها ريحة البراني و صافي بما أنني عشت فمحيط يكره الأخر كيفما كان ،المهم المفهوم الأول ديال حوار الثقافات بان مع صامويل  هنتينغتون huntington فاش عاد بان هاد البلان كان سميتو صراع الحضارات و هاد التسمية أقرب إلي الواقع ،و لكن من بعد تم تعديل الاسم إلى حوار الحضارات ليلائم الجمهور الناشى من فئة البالغين الصغار لي مزال كيخلعهم الصراع ، المهم هاد المفهوم كيتخالط لبزاف مع التعددية التقافية و لي تعتبر ظاهرة طبيعية نظرا لإختلاف البيئات و المناطق تكونو عندنا حضارات عندهم ثقافات و لغات و عادات مختلفة ،تقافتنا ماشي هي تقافة ديال الصين لي حتى هي مغايرة على التقافات السكندنافية و سير على الله ...

هاد حوار الثقافات كترات عليه الهضرة فاش تطور الإعلام و الطيارات و الأنترنيت و كترات الهجرة و البيع و الشرا مع الجيران ، لاحظنا الاختلافات لي بيناتنا و قواو الصداعات و بداو الناس كيقلبو على تفسيرات و حلول لهاد الظاهرة ،اول وصف بان كان هو صراع الحضارات و الصدمة التقافية لي من بعد رطبوه و رجعوه حوار ،و هو فالحقيقة غي شلاظة ،فاش كنت صغيرة كانو عندي خمسة الألوان باش نرسم بيهم و بما أنني كان كيعجبني التخلاط ،خلطتهم كاملين حتى خرج ليا واحد اللون مابين القهوي و الزيتوني لون الخرا و صافي ،صراحة ندمت بزاف تا لون مبقى يصلاح و العجب لي خرج ليا كيضر فالخاطر ،هادشي درتو فاش كنت برهوشة و معدورة ،و لكن المصيبة هي أن هاد التخليطة كديرها البشرية دبا ،من بعد ما الانسان شبكها حروب باش كل تقافه تعيش و دافع على المجال ديالها خرجو لينا عشاق الحريرة ، لي بغاو نكاح الحضارات ،جيب أسيدي دنجالة من إثيوبيا و فولة من مصر و تفاحة من كندا و خوخة من السويد و أهم حاجة العنب الروسي و خلطهم ،و دوق حريرتك ما نتا بخوخ ما نتا ببطاطا ،و لوح عليك الزمر و شرب الشراب مبقا ما يتقود فهاد الدنيا ،باختصار التعددية التقافية هوما الألوان لي كانو عندي كل واحد فقرعتو لي هي المجتمع باش نحافظو على خصائص اللون و حوار الثقافات هو الحريرة لي صاوبت فاش خلطتهم طمس الهوية و خلاص .
هاد الناس اللي كتعجبهم هاد شلاظة غالبا كيكونو رطيطبين و قلبهم هشيش ،و بغاونا مساكن غي نعيشو فسلام و لكن أنا عيشورية و منسواش ،وا تريكة القنب  العلاقة بين الأنا و الآخر راه مبنية على الصراع سواءا بين الافراد أو الجماعات ،إذن هاد الهضرة تاع السلم و التعايش بعيدة علينا و راه مكاين غي التناكح و التطاحن ،و هدشي مقالوهش غي الفلاسفة راه حتى فالتلمود مذكور "حرب هي حياة الانسان على الأرض"،إلى جينا نشوفو أسباب هاد الصراع خصنا نضربو تسركيلة فالتاريخ ،بعد تأمل غيبان ليك بلي تاريخ البشرية هو تاريخ البحت عن القص و التيتيز و الصرف ،الحروب كاملة لي دوزاتها البشرية سبابها هاد الثلاتة ،نبداو بالقص باش تكون عندك الماكلة خاص تكون عندك فلاحة مزيانة يعني أراضي خصبة و الما موجود ،هاد الظروف مكيناش فكاع البلدان ،قنت يصدق لك فيها الشكلاط و التفاح و أي حاجة بغيتيها فحال كندا لي كتسمى سلة العالم ،و شي قرينة كحلة فحال السعودية الزقوم مينبتش فيها ياربي السلامة كيصدق فيها غي البلا ،المهم هاد التباينات هي لي خلات الأراضي الخصبة محط أطماع الجيران و خلات الناس ديالها متشبتين بيها و كيدافعو عليها حتى للموت و الصراع على الارض راه من نهار هبطنا لهاد دنيا و حنا باديين فيه و حتى لدابا باقي شوف غي فلسطين و إسرائيل و الصراع مابين الشينوا و البنغلاديش على شي واد ،اودي وجوه البلا كتار و القص قليل و الجوع كافر و زعم تاكل لحم .
العنصر التاني لي نايضا عليه قربالة هو التيتيز ،كاع الحملات العسكرية لي دازو فتاريخ من عهد الكافر بالله جنكيز خان حتى لعهد سيدي رسول الله، كان فيهم السبي لي كيخسر الحرب كيقطعو راسو و يحرثو عيالاتو هادشي واضح و باين،الطرف محرك الشعوب  ،أعرق إشكالية فالتاريخ و راه ولاد أبونا أدم تقاتلو على ختهم و حنا التريكة ديال لي قتل خوه ،أه نحن أبناء القاتل و هادشي وارتينو الله يخليك، من الدقة اللولة الموارد كانت محدودة ،و لحاجة لي كانت كتشجع المحاربين هو الأمل فالحصول على ساطة قرطاسة حيت الزين قليل من زمان ،وخا دبا كاينة دمقرطة الجمال و السيليكون و العجب ،صناعة على قدها لترقيع الخيبات و لكن كيبقا لي عندو عندو ،لكانت صاحبتك مركبة الشفار و صابغة وجهها خوي عليها سطل ديال الماء و سطل ديال الزيت متعرف تلاقا مع ولد جيرانكم لي كان هارب لك بميتيين درهم هانا علمتك ،و هنا نبغي نطرح إشكالية على الإخوة الماركسيين لنفترض تاريخ سالا و فرقنا كلشي بتساوي كي غنديرو فالطروفة غتهزو موس ديال الشوارمة و تنقصو لتسونامي من ترمتها و ترقعو بيه  شي صكعة أخرى ،واحد يتصاحب مع بلارة و واحد مع الأخت عسو و لا غتديرو حكومة التناوب على التيتيز جاوبوني يا رعاوين، من هنا يبانليكم بلي المساواة غي إشاعة و نسدو هاد الباب بقولة الفيلسوف إيمانويل الستاتي البنات كيف الخيل كل واحد و قيمتو .
أخر عنصر هو الصرف ،الحبه او اللعاقة سيدنا عمر قدست أسماؤه و عملاته من الدولار حتى للبتيكوين ،كيفما كتعرفو كاين واحد  اللعيبة فالاقتصاد سميتها jeu  à somme nulle  فهاد الالعاب كيكون المجموع ديال اللعابة و الربح كيساوي زيرو، يعني باش تربح نتا خاص لي لاعب معاك يخسر ،و هادي هي اللعبه المالية باختصار الكمية ديال الفلوس لي كتسركل فالسوق تابثة و لي كيتبدل هو الناس لي عندهم هاد الفلوس ،باش دير نتا لاباس خاص ضروري واحد أخر يخسر و يتزلط ،إذن الأحلام الوردية ديال عالم بدون فقر غي تخوار الطبقية حتمية و الصراع أبدي غي بنادم ميموتش بجوع و صافي ،و كأحرار غنتقاتلو على الصرف حتى للموت .
كيفما شفنا الاسباب كثيرة باش نتحاربو ،و كاين طرق كثيرة باش نتحاربو من غير السيف و أهمها الحروب الاقتصادية و الثقافية ،و بما أن طاجين ديال اليوم ثقافي بامتياز عنهضرو على الحروب و الصراعات الثقافية ،الدولة السائدة عسكريا و اقتصاديا هي لي كتسود ثقافيا و هدشي لي دارتو أمريكا فيما يسمى بأمركنة العالم ،و فاك لتقافات لوخرين اللونغلي هي اللغة اللولة عند أغلب الشعوب وزيد عليها هوليود و الفاست فود و بزاف ديال التخربيق ،و هادشي داروه قبل منهم العثمانين للعرب تبعو سياسة ديال تتريك المستعمرات و ناكو التقافات الاصلية ،و نفس العملية داروها الرومان فاش ستعمرو نوميديا رسمو اللغة اللاتينية و عطاو لحق فالتجنيس للأمازيغ لي خدمو فالجيش كتر من 25 عام و أكتر من هادا الامازيغ عبدو الألهة الرومانية الى جانب الالهة القرطاجية حتى بانت المسيحية و عتانقوها كاملين يعني رجعو رومانين صحة .
هاد التقافات لي كيتصارعو لجينا نحللوهم براسهم غنلقاو بلي التقافة مقلة فيها الدين و الماكلة و اللغة و التقاليد يعني فلسفة الحياة ديال الشعب و الأذواق ،إذن علاش مقالينا مكيتحاملوش؟حيت فتاريخ الفلسفة كل فلسفة حاولات تتبث بلي هي الصحيحة و تكون هي الأخيرة ،أي فلسفة كتجي كتنزل على لي قبل منها ،العدمية ضد الوجودية و البراغماتية خرات بضحك على المثالية و نتا غادي ،و هدشي كاين حتى فالاديان الدين لي بان كيعتبر راسو هو الصحيح و هادشي ماشي عيب بالعكس هادي هي الطبيعة ديالنا و خصنا نتعاملو مع الواقع كيفما هو ماشي كيفما خاصو يكون،الحاجة الثانية لي كتشكل الثقافة هي الذوق ديال الشعب فالماكلة و اللبس و الموسيقى ،طبعا دعاة التشلاظ الثقافي كيآمنو بلي الأذواق لا تناقش و خاصنا نحتارمو أذواق بعضياتنا نعام سيدي ،إيوا نيتشه كيبلغ ليكم السلام و كيقوليكم ديرو يد فيد و يدكم فيه كاملين الاذواق لا تناقش بل تتصارع ،الحياة أبتعمي كلها غي صراع بين الاذواق .و التقافات مكيعيشوش بالطليب و الرغيب التقافة كتفرض راسها بالعز و بالقوة و لا كتقود .
و نزيدك حاجة ديك الهضرة ديال إدماج الثقافة الأفريقية و غناوه فالمجتمعات باش نحققو السلم زيدها فكرك،العبيد براسهم متحرروش بالنضال ديال مونيب ديال القرن 19، العبيد تحررو بإرادة الإنسان الأبيض لي بغا الاعتراف ديال الإنسان الاسود حيت الصراع الاقدم فالتاريخ هو الصراع ديال الأنا باش يعتارف بيها الأخر و لو بكومونطير ،و باش يعتارف بيك الغير خاص يكون عندو الإرادة و الحرية ،و هكذا تحررو العبيد مكاين لنضال لبركوكش .
من هادشي كامل فلنتصالح مع أشواكنا ،و الحل هو نخليو مسافة بيناتنا باش منتجرحوش و أفضل حاجة تخدم التعدد التقافي هي كل واحد يشد تيقارو و لويناتو راه التخليطة تؤدي إلى الحريرة ،و ترجلو شويا راه مجيناش نتلاحسو و نشطحو أحواش ،جينا نتصارعو نطاحنو و نستعمروا العالم ،و نكتاشفو و إلى كنتي عدمي و كيبان لك بلي غي مليوح هنا ،مدام باقي منطاحرتيش خاصك تقبل بشروط اللعبه و تمضي سلاحك راه مكاين غي الدق ،و إلى بغيتي تأكد سير نهار جمعه حدا الجامع و ياربي تكون الخطبة على الإيثار و الأخوة و شوف المصلين فاش يخرجو عند مول الديسير ،بربي تا كيرجعو ماسونيين الحاجة الدريويشة لي كانت كتغبن مع الفقيه كتولي منوضة حرب باش تعبر هي اللولة و كلشي باغي أحسن عزلة ،أما لمشيتي للحمام وايه وايه الحروب المائية بالسطولة ،و بلا منساو الانسة المصونة لي كتجلس حدا البرمة باش تغسل جوج زغبات ديالها و كتخلي القبيلة كتسنى ،شعرك يا بنت القحبه غنضفروه و نقطعو بيه نهر الحياة الله يقطع لجد بوك الجدر ،و بهاد المقطرة نختم الجلسة و الحريرة قادمة إن شاء الله.