أدبيات العراضة رسالة للنتوات المغربيات

بوسط تافه موجه للنتوات المغربيات لعل و عسى يرحمونا من البهلوانيات و التقردين لي كيديرو فاش كيعرضو شي واحد لديورهم ،هادشي لي غنهضر عليه مطلع ليا الزعف و القوق فراس.

أولا عزيزتي فاش نمشي عندك و طيبي شي حاجة بلاما تسوليني كيف جاتني أنا ماشي حكم دولي فالطبخ،و إلى كليت طيابك كاين جوج إحتمالات يا فيا الجوع يا بغيت ندير ليك الخاطر  باش تسدي علينا فمك، و بلاما تبقاي تفهمي عليا فالنكهات ،راه كاين جوج ماذاقات يا بنين يا باسل ،و غالبا طيابك سيدتي فحال وجهك ،إلى كنتي زوينة طيابك غيدوز فوجهك ،و إلى كنتي خايبة طليه على كمارتك، و ثانيا فاش نساليو بلاما تقولي ليا وا كلينا كان فينا جوع ،راه بالعقل مدام كلينا راه كان فينا جوع ، باينة  مكانش فينا الحنين للماضي الفهامات ديال الويل ،و نزيدك بلاما تفرعيني بالتميز ديال أتاي لي كتطيبي ،الساطة الماء هو الما و أتاي هو أتاي و السكر  هو السكر ،إلى كان شي تميز غيكون فالميكروبات والحجابات ،قاليك أتاي ديالها مكاينش فحالو  الشفرة ديال دافينشي مثلا نقصو من الشموعات ، و الله يرحم والديك تلامط ديالك زوينين غي سكتي ، عرفناك فنانة و عندك الذوق فالألوان و بلاما توريني منين شريتيهم ،راه مزال مفهمتش لاش كيليقو أصلا ، من غير الناموسية لي كنعس عليها  كلشي كيجيني زيادة،  و إلى جابتنا عندك الوقت أ صكعة الأيام متورينيش تصاوركم ها العار معندي مندير بكمامركم ، و تامارة ديالك مع ولادك مسوقيش فيها ،و الوحم ديالك حتى هو معندنا منديرو بيه ،تعلمو تعانيو فصمت الله يرزقكم العذاب، أما عن العبقرية ديالك مع راجلك تقدري تكتبي عليها كتاب و تبخري بيه . و هداك الخاتم ديال الذهب لي جابو ليك راجلك مغنحسدكش عليه اوك،  و معجبنيش اصلا  و نزيدك الذهب راه معدن ديال الصراع  كيجبدوه دراري صغار شادينهم المافيات عبيد تيغتاصبو العيالات و تيستعبدو ولادهم حتا يوصلو 14 و يقتلوهم ، إذن أي إنسان حر مخصوش يشري الذهب ماشي حبا فالعبيد و لكن كرها فالعبودية، و أخيرا عزيزتي المروكية رحمينا من التقردين و البهلوانية تكفينا عبثية الوجود اوك يالاه تلاحي.