موضة العدمية و متلازمة العمق في الويب المغربي

شالوم إخواني المسلمين صراحة أول مرة دخلت للفايسبوك تساطحت مع الموجة ديال العدمية و الستاتيين الجدد و هاجوج و ماجوج و وليدات سيوران و ألبير الكامبو ، صراحة أنا العدمية كانت ضرباتني قبل منعرف هاد الاشكال و وصلنا ليها الحمد لله بلا قرايا ، و ما فدينمها ميعجب و كنعتبرها أقود مرحلة فحياتي وباقي كنعيش التداعيات ديالها ( هههه هاكا وايلي على تداعيات الحرب العالمية) المهم نرجعو للإخوة كارامازوف بجماعة ولاد تايمة ، هو العدمية كفكرة أو بلان تقدر توصل ليها فأي لحظة و تلوح عليك الزمر كامل و تعيش بلا معنى بلا معيار بلا هدف ، هادشي تقدر توصل ليه و ما كاين حتى شي مشكل ، الحياة فيها شويا ديال العبثية وكل واحد كيفاش كيتعامل مع هاد البلان ،غي هو فبلاد العجب هاد العدمية  ولات هيت و موضة و ميعوها و مرقوها فحال ديما ، خرجو لينا  رابعة ديال المؤثرين و الصفحات و تبعوهم جيوش ديال الحمير الناطقة و أراك للعادام و العبثية و ما انعتق و ما انفك ، الله يستر المعاندة حتى فخلى دار بوك .

ولا البرهوش ولا البرهوشة لي حس بعظامو كيعنق رواية البراني  the stranger ديال كامو ولا كيستف شي جوج أجزاء ديال ديوستوفسكي و أراك للعومق ، كيولي خونا عادمي عاميق مواطن من درجة بئر ، شي سوداوية نعام سيدي و كلشي بغى ينتاحر و حتى حد ما مات ، كاين لي غي مسخوط و كيصحابلو راسو عدمي ، و لا شي قردة بئيسة بؤس احلام مستغانمي مع الرجال و يسحابليها البؤس هو العمق ،كلى أ بنت عمي كاين فرق وخا معارفاهش ، ولى إنجار زعما الواحد عدمي و كيفتخر، بنادم غي مجرور و مفاهمش حتى علاش كيدوي ، يالاه كيحفضو شي تقيوتات ديال السميات فحال كيرجارد  و سيوران و نيتشه و كيتربعو على عرش الميلانكوليا (السوداوية)  و بين هاد الطفيليات بان واحد النوع ديال السحالي فشكاال هوما لي جابو التمام لكحل الراس ، هاد الفئة هوما لي ركبوا على الهيت بهدف النيك ، بنادم كيدير تصويرة بالبيض و الكحل و ما تيسر من الجوانات و قهوة كحلة ، و شي مقيلة ديال الاقتباسات و ليسونس في فن الغميق و أراك لنكح القاصرات عقليا ، هو الصراحة مزيان لواحد ينكح فابور و يستاغل السوداوية فجلب التيتيز ولكن هذا لا يمنعني نقوليك أخاي ديالي بلي العدمية موقف من الوجود ماشي من الطبابن وإيلا اختاصرتي الوجود فتوتو سير الله يلعن وجود مك .
أين الاغراء فأنك تكون فاقد للبوصلة وعايش فالفراغ ، اللامعنى راه قاتل و يدعو للانتحار ماشي للتفاخر ، غي حنا عندنا نزعة تمريقية لكلشي حالة مقودة إيلا وصلتي ليها برجليك عرف راسك كحلتيها رجعناها موضة ، كشخص عاش العدمية و وصل للقاع و تخبطت حتى عيت و تلفت صندالتي راه الرباح الوحيد هو شوية ديال اللاتسوق أما تعيش بلا قيم بلا معيار راه مقودة و بزاف اودي جاب الله كاين الله أما البشر راه طغى ، وبلا منهضر على هادوك  العاميقين لي غامقين على الشعب بالسكات و اللامبالاة حقا و الواد الناس فشكل و كيديرو رجل فوق رجل و يد على الحنك زعما كيفكرو أممم هاي هاي على الغرق ، كونو عفوين أ الزمر و بلا تعقيدات و عياقة و نفيخ ، غي هضرو راه الصمت ماشي ديما حكمة راه يقدر يكون غي شي واحد داعي فيك باللقوة ، وكيفما قال واحد خاينا لصاحبو لعاميق فتاجر البندقية don't use silence to make foolish people think that you are wise and smart ، كاين شي قماقم كتشوفو ساكت كتقول هنا نبات غي كيحل فمو كتهرب غا بقاو ساكتين حسن ، صراحة هاد المغاربه ضرباتهم متلازمة ديال العمق الله يحفظ ، و بالنسبه للإخوة الفهاماطورات لي كيقولو ليا نتي غي كتحلي فمك و كتنتاقدي قتارحي حلول ، لا أ صحبي انا راه عندي الحلول نعم أملك حلولي غي هو درتهم فالصاك و نسيتو فالدار المرة الجاية نجيبو معايا غي قولوليا الحلول واش  بغيتوهم قويلبات ولا كينات الله يلعن لي ما يحشم قاليك جيبي الحل المندوبية السامية للتخطيط أنا ، ديوها فسوق راسكم شويا ، أنا انتقد بهدف التقشاب و ماشي بهدف الوصاية على شي قمقوم أو قمقومة و في الختام الله يعطيكم لي ما كاينش .