الانبطاح الثقافي عند المغاربه

صباح الخير وخا مكاين لا صباح لا خير إذن سنكتفي بمساء الزفت ، وراه مكاين غا هو نيت حنا مجتمع لي زفت كلشي إلا الطرقان تركناها للقدر أو منعرف شكون ، ما عليناش واحد البلان ديما خارج ليا من الجنب : ولي هو العشق المبالغ فيه للغريب و الدخيل سواء شخص براني أو ثقافة على قدها ، نبداو بالانجداب للغرباء كأفراد بما أن الأخرون لي كنعرفو كلهم جحيم و كيحكمو علينا و يفرعون رؤوسنا ،كيبقاو الغرباء هوما الأخرون لي مكيعرفو علينا والو و ميقدروش يحكمو علينا ، إذن شوية د الانجداب لهاد الصنف الحشري كيبقى شيئ عادي و مقبول ، و الأدب العالمي حافل بالغرباء و أشهر الروايات ضروري متلقى فيها مجموعة ديال الناس الغرباء الساحرين ، تا لهنا مكاين موشكيل المصيبه كتبدا فاش شعب كيهمش ثقافتو و كيبدا يقدس فثقافة على قدها و يهزها بزبلها  ، فحال فالمغريب كاين طرف ديال المغاربه كيسبح و يهلل بفرنسا و عشاق هوليود كيألهو ميريكان و الشمال مفطومين على الصبليون ، و صحابات سامحيني مضروبين على تركيا وبلاما نساو صحاب الدراسات الإنجليزية و الفرنسية و الألمانية هادوك أصلا غرباء فالوطن جالية منفية جالسين عندنا حتى يعفو عليهم الله .
فاش كنجيو نشوفو الأسباب ديال هاد التشرويطة فالشعوب الأخرى كنلقاو غالبا السبب هو السينما لي كتعكس صورة مخالفة لواقع الشعوب ، بنادم كيتفرج فسيريات ديال ميريكان كيسحاب ليه العيشة تما جنة ولا ختنا كتفرج فشي مسلسل تركي كيبان ليها حتى الشفار زوين و كتبقى تفونطازمي على تركيا و الأتراك أيه راه عندهم الويدان ديال الشكلاط غي سيري ، و أحسن مثال هوما الأفلام ديال الميكسيك لي شفناهم فاش كنا براهش ، ولي كيصورو ليك أمريكا اللاتنية فحال جنة العشق و فالواقع دوك البلدان ساحة ديال الإجرام و القتيلة صافي مكاين لا حب لا سيدي بليوط ، و فمقابل هاد البلدان لي عندها بومبا كتنفخ فالثقافة ديالها و كتزوق فيها حنا عندنا منابر إعلامية فحال أصوات مغاربية و أخواتها الفاسقات  لي المهمة ديالهم هي الحط و التقليل من أي حاجة مغربية و تقزيم التقاليد الأصيلة لي ولات مرادف للرجعية ، بنادم كيتفرج فشي سينما كلها نفيخ حتى كيتنفخ ليه القلب بالزين و الحضارة و الطبيعة و الألوان كيقلب يشوف البليدة كيلقى رمانة و برطال مجرتلين و يقطعو الرزق ، كيطفي الزمر و يتكونيكطا كيلقى أصوات مخاربية مطلع ليه كريطات مغربيات يتحدين العادات البالية و يتزوجن أجانب ، بعرورة تثور على التقاليد و تحقق أحلامها تقول نتا التقاليد كانت حابسة عليها القراية و الخدمة ، بنادم كتولي تبان ليه الثقافات الأجنبية هي الطوب و المثال لي خاص يتبعو باش يولي جزء من الحضارة و عاداتو و تقاليدو غي زبلة و عار خاص يلوحو باش يزيد القدام .
هادشي علاش ولينا كنشوفو ناس يحشمو يقولو ليك راه كنا مقصرين فشعبانة ، وعاشورا و السبع بو بطاين غي تخلف ولكن الهالوين كوول بربي كن هاديك الكرعة المنقوشة هزها شي واحد فدكالة حتى يطلعوها عليه  و يبداو عليك أش هاد تاعروبيت ولكن حيت هاديك الكرعة معنقاها أليكس فميامي هانية و مزيانة و زينة ، الله يبرد ليكم الوجه الجنس القصيف، بنادم وليتي كتشوفو ملبق الطابع د إفريقيا مضروب ليه فالجبهة و النيف و باغي يدير فيها كاوري و كول حتى كيرجع ثقييل على القلب و الدوارة ، صعيب يتهضم ليك ، فحال المغربيات لي كيلبسو الحجاب التركي و كيرجعو كي الجفاف واش عندكم وجوه التركيات يا المقزدرات ؟ درية فالقهوي و لابسه الغور و حماق نتا ، المروكيات المحجبات كتجي معاهم الجلابه و صافي كيبان اللباس متناسق مع الكمارة ، حيت كل قوم كيجي معاه ستوناتو ، شي من شي نزاهة و شي من قلة شي سفاهة البلان ضاير على الأصالة و هادشي علاش  الكيمونو كيجي مع الجابونيات و غالبا إيلا لبستيه و نتي من حد سوالم غتباني فحال شي جرتيلة ، لذلك الواحد يعز راسو و يلبس تشامير جداه و يخرج عينيه ، هو راه مزيان نستافدو من التقافات لي فايتينا و نتعلمو منهم شي حوايج فحال النظام و لا نقراو العلوم ديالهم ، ولكن باش نشدو ثقافة كاملة و نلصقوها مجاتش ، راه فحال الفرق ما بين يعجبك كتاب ديال شي كريط و تآنسبيرا منو و تكتب كتاب بأسلوبك و لا تشد الكتاب و تنقلو بالنقطة و الفاصلة ، و من اللخر لي بغا شي حضارة ولا ثقافة يصنعها لكرو ، راه ما يدوم جقير .

 و لواحد يعز راسو شوية ميبقاش غي حال فمو فعباد الله و يعاير فولاد بلادو لي هو واحد منهم ، راه فاش كتقول المغربيات موسطاشات هادشي مغاديش يرجعك سويدي راه خرزة وحدة خرجتو منها بجوج ميمكنش ختك تكون موسطاشة و نتا كتقطر بالزين راه جينات وحدة و خيوبه وحدة طالياها إفريقيا مجموعة (وخا الزين مفرق) إيوا قبلو على بعضياتكم الخوت ، وقبل ما نغبر خاصني نقول تفو لهادوك الدراري لي كيفرعونا بتصاور الكاوريات الصفريطات صباح مساء ، ملي يفيق و هو يبوسطي فتصاور الزعفران يالاه الموسطاشات باش كتحسو شوفو الزين و لاطاي نتوما عندكم ثقافة خبزية ، أوه مون ديو و نتا الحمار لي حطك عند أصل مك ثقافة تاع السوشي ، باش كتحسو أنا بعدا كنحس براسي باغية نتبع شي واحد بالحجر تا نفرق لمو داك الراس ، وكيجي صاحبو كيدير ليه التأصيل الفلسفي ديال الطرف وا الساط هادي كريطة من واحد الدوار فزك إستونيا عندها واحد السوتيامات فالغوز مقودين ، التيتيزة الأكثر فتكا إيه أولد القحبه كنتي كتحارب فلاندوشين و كتفهم فالأسلحة الفتاكة ، الله يعطيك الزعل أ كلشي محن ، و هاد الماركة كيحسو براسهم ضايعين و نهار غيمشيو لروسيا ولا السويد غيدور بيهم التيتيز ، سير أ حميشتي راه غيدور بيك غي فريق البحت و الجيولوجي راك مستحاثه حشرية و ماشي بعيد فاش انقرضو الديناصورات تشبح ليك شي واحد فالمخ و داكشي تعفن و من داك العفن كتجيب هاد الحكم ، مخاخ تولد الأفكار و مخاخ حاضية الأكرار ، أما الدريات لي طيبونا بالتيتيز التركي و الكوري سأتركهم للقدر دعيناكم لله هنيونا من الطيران و كل واحد يديها فثقافتو أ تفو .