الخطوات السبع لصنع الهالة الشخصية

شابات شالوم بينما كنت أنا و عشيري نبحت عن كريم مزيل للهالات السوداء ، دخلت للفيس و أنا نلقى واحد الطبقة من الكلس البشري تحاول صنع هالات حول شخصها الكريم ، طبعا انا خرجو عيني و حليت فمي و قلت مع راسي أشاوا هذا مال العولاما دياولنا مخيبرين الناس كتحيد فالهالات و هادو كيصنعو فيها ما هذا يا بابا ميمون ، كنت غادي نبدا نتسائل و نعربط كعادتي و لكن تفكرت شي بياع و شراي كان قال بلي حاجات الناس مكتنتاقدش تلبى و صافي ، و من هنا قررت نعطيكم خطوات صنع هاد الحريرة زعما كيفاش تصايب هالة إخواني أخواتي  :

*أولا خاصك تعرف بلي البروفايل ديالك هو لي كيعكس الشخصية لي معندكش ولكن غتبين بلي كاينة ،نبداو بالتصويرة خاصك تخنزر ليا فالبشار و تبان قبيح و واعر و رش التصويرة بشوية الظلام باش تبان غامض و عندك ملفات سرية فجيبك الخاوي و بقى تبدل التصويرة مرة مرة باش تبان معندكش الوقت و مشغول و متنساش فل intro  دير شي دخلة مطلسمة داكشي ديال قشع ما تبرق باش ضرب على الشعا و بنادم يتخلع  .

*ثانيا ترفع ليا على البشر و الصور السائدة و داكشي لموضحيك أخي أختي الضحكة هادشي  مغاديش ينفعك فصنع الهالة دير شي مقيلة ديال المنحوتات لي كاينة فروما داكشي يكون قيصري يوحي بالعظمة و الارستقراطية ، و زيد شي لوحات ديال شي فنانة مكتصقمش سمياتهم للناس باش إلى بغى شي واحد يحصلك شي نهار يعوج السمية و دور فيه و كون قبيح و قول ليه سير حتى تعلم تنطق سمية الاسياد أ ولد العبد عاد جي هضر معايا .

*تالثا البوستات ديال مول الهالة خاص يكونو أعمق من البئر مكاين غي الفهامات و التميز و قراءة ما وراء السطور و ما بين خط السترينغ ،و خاص ديما تكون عندك نظرة مخالفة للناس ، و حاول تلقى المعنى الباطني لكلشي ، حتى كسكسو لقى لجد بوه شي تخريجة،  أ ليست حبات الكسكس اللامتناهية رمزا للإنسانية الكونية و تدويرة القصعة رمز للأبدية و السبع خضاري ترمز لقدسية رقم سبعة عند اليهود و أكيد عندو امتدادات فالكيان الصهيوماسوني إذن كسكسو مؤامرة ،إوا قطعوه الله يقطعكم راه كيجيب الدوخة تقول موحم ماشي مغدي .

*رابعا الاستشهادات: أي بوست خاوي كتبتيه عمرو بأقوال الفلاسفة ، راه ويكيبيديا غي هز و حط و هانتا بهالتك أ صحبي نتا معندك متقول بقى غي الفيلسوف لي تساطحتي معاه عمر بيه البسطيلة وخا يكون شيخة و بقى تعظم الملهمين ديالك فحال مثلا العظيم هيوم المبجل روتبارد كريطة أين راند ، كفر بالله أخي و آمن بالعلم و العولاما القرآن تخاريف و لكن هضرة المفكر وحي من عند رب رحيم .

*خامسا التفاعل ديالك مع البشر خاص يكون قليل كومونطي غي عند المؤثرين باش تبادلو التأثير و متجاوبش الناس نتا راك عروستنا خاصك النكافات و نبداو نطبلو ليك مضسرش الناس و بعد من العفوية باش ميفرشوكش بقى ديما تشوف الناس من الفوق و دفل عليهم مرة مرة ، تكبر و ترفع باش تكبار و توساع ليك (زعما الهالة) ، و فينما يبان ليك شي بوست مجموعين فيه الناس وخا يكون على فلان إديال جي دير ليه شي مقاربه فكرية و فلسفية و بقى تستعمل كلمات فحال الباطن التعقيد التركيب التفكيك و سير على الله.

*سادسا الموسيقى لي كتبارطاجي خاصك تخير فيها مزيان ، خلط شوية ديال الكلاسيك ها روسيني ها تشايكوفسكي ها فيفالدي المهم كاين بزاف ديال السميات تخير فلي بغاها قلبك ،وبقى تحتاقر حمادشة و عيساوة و لكن قدس الميطال خلاصك أخي فالميطال و شد فالتعقيد الموسيقي و عمق الكلمات و  صعوبة الالحان وخا تكون كتصنط غي لشي براهش ديال الغوتيك فضح بيهم الدنيا ، و شوف راه وخا تسمع حتى لصوت اللدون كيتطفا فالما راه تا هو ميطال ياك اللدون معدن إيوا مالك ؟ ، هو فعلا الميطال موسيقى مجهدة و شخصيا كتعجبني و كاين ناس كيفهمو فيها و غادي نعتاذرو منهم الموسيقى ديالكم غادي نستعملوها فتوسيع الهالة ، شوف و متنساش حتى الفولك الاسكندنافي مزيان ضبر على شي ديسك بالشلحة ديال النرويج و عيق بيه أصلا معرفوه علاش كيهضر ، حتى الشيخات كانو موضة شي وقت عند الهالات العدمية و لكن كيبقاو استثمار فاشل تقدر تمشي ليك الهالة و تعواج شد غي فاللدون زعما المعدن .

*سابعا فاش تنصب هاد الحريرة و تقاد الهالة خاص البروفايل ديالك يعطعط بريحة الفهامات و الحرية و التميز و العمق ، و حضي مع الهالة ديالك راك تمحنتي فيها حافظ عليها و بعد من المضا الناس الماضية عطيهم التيساع راه يتقبوك متنساش راك بالون عامر غي بالخوا لعب مع الهوا و الناس لي ضارب ليها الريح فالمخ ، و إيلا حصلتي شي نهار طمر دير داك البلان ديال صمت الألهة و بلي مكتجاوبش مع الرعاع أو البخوش و أخيرا دير الهالة و تهلا فيها، وخا غادي تبان متصنع و لكن أش غنديرو الهالة فحال ثقبه الزين إيلا معطاهاش ليك الله و تصنعتيها كيبان حنكك عوج و لكن نديرو ليكم الخاطر و الله يعطيكم الزعل مبقاش فيسبوك ولى مملكة الظلال.