الثأتير من القيصر و كليوباترا إلى نيبا و هيفا ماجيك

أهلا و سهلا بقرائي الأعزاء و شكرا لكاع لي سولو فيا فاش غبرت  هممم وليت مؤثرة يا ختي المهم أنا جيت اليوم باش نخور كيف ديما و لي بغى التألق يتفرج فدا فويس ، وداكشي ديال المشاهير ، و البلان لي غنهضر عليه قريب من هادشي دبا إيلا حنززتو مزيان فالتاريخ ديال كحل الراس غتشوفو بلي باش يكون عندك شي تأثير فهاد العالم كان خاصك القوة سوا قوة خشنة بالسيف و السلطة و الحكم و  الفلوسات أو قوة ناعمة تتجسد فشي طرف يقشعر له البدن و يسر الناظرين وديك الطلعة ديال يا ذات السترينغ الأسود ماذا فعلت بسلكوط متعبد ، و هاد جوج بلانات مزيانين حيت القوة الحرشة زعماكينات الهارد باور عطاتنا قياصرة مقودين و محاربين أفذاذ وكذلك الإغواء نتج سلاكط مقرطسين و مطورين فحال كليوباترا و الإمبراطورة سيسي وباقي القحاب الشريفات ، و هادشي زين و مزيان حيت غربل بنادم و  خلى غي المقودين لي يتنتاخبو طبيعيا ، الحاجة لي مزيانة للبشرية إلا أنه في عصر التخوار نكنا الداروينيزم و فبلاصة ميبقى التأثير بالقوة ولا عندنا التأثير بالنجومية و الشهرة أي أنه يكفي يعرفوك الناس و يكون عندك كونط فإنستغرام تابعك فيه مليون ديال التابعة باش تولي تا نتا مؤثر و كتدير الإشهارات و تحرك العبيد ديالك ، هادشي مزيان لماليه ولكن خايب على المدى الطويل و غادي يقودها علينا و هادشي لي غادي نوضحو فالتخربيق لي جاي .

غنبداو بالبدية ديال البشرية فاش كان كحل الراس مخاري مع الطبيعة ، باش الناس يسلكو و يعيشو و يخليو التريكة ديالهم كان خاصهم يتسلقو هرم القوة هاد الإكراهات و الحروب خلات بنادم يطور مهارات و استراتيجيات ديال الحرب باش يزطط كرو ، حيت الحياة صعيبه و الحل الوحيد لي كان عند الذكور هو يهزو السلاح و يتقاتلو على الأراضي و الطروفة ولأنه باش تربح الحرب ما جاتش تبقى جالس يا ختي عا تا تهز مقدة و تبدا تشلخ فالريوس داكشي علاش  المحاربين طورو تاحراميات و تاكتيكات ديال القتال و بزاف ديال الفلسفة و العلوم فحال صان تسو و القيصر ديال روما ،ولي ما هزش السلاح هز الريشة و رسم لوحات متورخة ولا نحت شي منحوته ربانية فحال بيرنيني لي خلى لطاليان تماثيل ترفعك لسما السابعة ، المهم أن الإكراهات و قلة الموارد و ضرورة التعازيلة خلات بنادم يحك البصلة السيسائية باش يصوفي كرو و لي خلاو بصمة ديالهم فالتاريخ و كنقراو عليهم دبا كانو مقودين بجهد سوا فالحرب ولا الفكر أو التقحبين ، البلايص لمتورخة قليلة و بنادم المخور مكيخسروش عليه المداد داكشي علاش العبيد كيقودو في صمت و الأسياد بقاو خالدين بالإرث الفكري و الفني و المادي لي خلاو ، المؤثرين  ديال بصح خلاو إمبراطوريات قد السخط ولا جابو أديان و شرائع باقي عايشة لدبا ،كتجبد سمية المؤثر وكتأمل فأداة التأثير لي تقدر تجسد فشي لوحة تهزك أو تمثال يصدمك و يخليك تسول راسك واش هذا بشر فحالنا ، الجواب هو أنه فعلا بشر فحالنا و لكن تسامى و تأله على كحل الراس بالقوة و الإبداع ، و الزوين فالتأثير بالقوة أنه مكيحتاجش الإجماع ديال العامة و الإعتراف ديالهم ، أفلاطون فيلسوف مقود و باهم كاملين و لو كره نيتشه و كاع لي بغاو يقلبو الأفلاطونية و وخا متقراش ليه و لا ميعجبكش بزز منك كيبقى راجول حر و حار وخا يضرب المسوس ،يكفي أنه كاع محاولات التفلسف فالتاريخ هي إما تقمص لأفلاطون أو محاولة لقلب الأفلاطونية السيد دكو فالتاريخ من أضيق أكراره ، و بزاف ديال الفنانين المقودين سوا فالموسيقى و لا النحت ولا الرسم  خلدهم التاريخ وخا تعيش و تموت بلاما تسمع عليهم التأثير ديالهم حقيقة وخا متوعاش بيه، و شوف مثلا غي الطاليان كيفاش كانت غتبان بلا دوك التماثيل و التحف و سمو عليه لي خلاوه المقودين لي دازو فهاديك الأرض السعيدة ، الأثر لي كيجي بالقوة خشنة كانت ولا ناعمة كيدوي على راسو براسو و كيأرخ مخو بلا فريع بلا ذبان .
و هاد القانون داز على كلشي حتى العيالات لي كانت القضية  عندهم صعيبه وباش يعيشو و يبلزو البجاغط مكانش عندهم امل باش يتواجهو مع الرجال جسديا ، لذلك طورو استراتيجية ديال الحرب خاصة بيهم غي هوما بلاصة ما يخشيو السيوفه كانو كيبلعوهم... و لهذا فليفلات طورو فن الإغواء و شي تقحبين بقواعدو و تستمتع فاش تقرا عليه، المهم كاع العيالات المتورخات و الملكات المقودات من كليوباترا حتى لإمبراطورة سيسي مكانوش كيحاربو لكرهم إنما كرهم حارب عليهم ، إيلا قريتي السيرة ديال كليوباترا غتشوف أنه فاش كانت كتواجه شي مشكل ولا كتبغي تدخل شي حرب كانت كتجمع كساويها و سليباتها و روايحها و كتقود لروما تقدى القياصرة و الجنيرالات و راه دازت على ربهم كاملين ، و طيحات يوليوس قيصر بجلالة عرشه ، و صراحة كيعاودو عليها بلي مكانتش شي زين ولكن كانو عندها شي دخلات ميلودرامية و شبعانة كاريزما و كاع الغاويات فالتاريخ من ملكات و لا جواري لي طيحو السلاطين ديالهم مكانش عندهم غي الزين بوحدو، حيت الطرف شرط لازم غير كافي فالإغواء ،داكشي علاش الفليفلات كان عندهم مع الشعر و اللغة و الإيحاء و الموسيقى ، حيت اللغة فخ و المرأة حتى هي نشبه لذلك النتوات لي عندهم مع البارلا كيكونو مقرطسات و كيقضيو غاراضهم فحال مثلا الامبراطورة سيسي هاد ختنا كان عندها مع الدوران و مكتحطش زكها فالقصر، و حيت البلاط النمساوي كان فيه بزاف ديال البروتوكولات ملقاتش راحتها و فاش سافرات للمجر لي كانو معاديين مع النمسا لقات الحرية و عجباتها هاديك البلاد ، و بقات كتحلون على الامبراطور ديال النمسا و مع ختنا مجهدة فالتعبير و الإقناع و عندها الزين قنعات راجلها يفك الصراعات لي كانو بين الدولتين و دارو اتحاد وخا كانو فحال المغريب و الدزاير و هادشي كامل غي باش تمشي تخيط الدروبه و الزناقي ديال المجر ، بشاخ نعام سيدي الساطة تحكمات فالمصير ديال جوج دول بالتحلوين ، و وقعات شحال من مرة فالتاريخ الجواري المشيطنات تحكمو فمماليك قد السخط و باش جارية تدير هادشي خاصها شي حاجها كثر من الزين ضروري تكون زايدة نغزة  فالداكا ، و هاد السيدات كانو واعين بلي الزين ما دايمش لذلك كانو كيطورو جادبية و كاريزما بعيدا على الشكل بالفهامة و الحضور و الشخصية أما الزوينات لي مخهم خاوي راه كتبقى مكوزة حتى كتشرف و كيخشيو مها فالكوزينة ، و الحاجة الزوينة فهادشي هو أن هاد العيالات مكانوش كيحتاجو يغويو الأمة كاملة كانت كتنيش على راس الحربه و كتصوط فعبيدو ماشي فحال المؤثرات ديال إنستغرام كفتات عليها إفريقيا و الماغول و شوف تشوف واش تشد شي إشهار ، الخايب فالتأثير بالشهرة و النجومية هو أن بنادم بلاصة ميركز و يصقل شي موهبه مقوده ، ولا كيدوز أغلب الوقت فجميع الفولورز باش يبني ليه قاعدة شعبية ولا جيش تسكاتي و نهار غيموت غيقود هو و التابعة ديالو مغيخلي وراه لا علم لا فن لا تا وزة ، راه شحال من واحد الميزة الوحيدة ديالو هي أنه معروف ، ودبا دخلنا عليكم بالله هداك وحيد القرن  ديال نيبا أش غتستافد منو البشرية و مع ذلك حيت بنادم تيعرفو راه كيضبر فإشهارات و كليبات ، و هادشي غادي يقودها على البشرية من هنا لقدام شوفو غي الموسيقى ديال هاد الوقت أغلبها عامرة غي تلواز و الموسيقى يجيب الله ، و كثر من هادشي التأثير ديال المشاهير قودها حتى على  معايير الجمال ولات أي وحدة مشهورة بالضرورة خاص تعجبك و بالضرورة راه زوينة غي حيت الناس تيعرفوها ، وا خرج وقوليهم ريهانا مكتعجبنيش ولا هاديك اللاوية لانا ديل راي راه كتشبه للسخفة كثز من بنادم و شوف شحال غادي يضورو فيك ، لذلك الداروينيزم تناك و نحن من خورناه هاد النجوم ديال دبا أغلبهم متستافد منهم تا وزه وكاع كيتشابهو ضرب ضويرة غي فإنستغرام و شوف المؤثريين والمؤثرات نفس الشلاقم و نفس التكويزة كيتناوبو على الكولونات و سمطة ديال الكلاب و سبحان الله عندهم نفس التعواج و الهضرة و التقحبين ، وحتى الدراري نفس التحسينة و الوقفة و هزة الحاجب  معندهم تا قيمة مضافة و نهار يطيرو ليهم الفولورز يرجعو نكرة ، أي أن القيمة ديالهم مرتبطة بالناس لي كيعرفوهم داكشي علاش كيبقاو يلحسو ليهم فالكابه صباح و عشية كيديرو ألف فيديو فالنهار وجملة مفيده ميكتبوهاش ، يالاه كيوثقو فالحياة اليومية ها حنا صيبنا الفطور ها حنا كليناه و تسناها نتا حتى تخراه و تصورو ليك النمي كيداير ، و السؤال كيبقى هو واش مزال البشرية غتنتج شي فن و إبداع ولا سدات مدام ، وكيفما كيقول الشريف البشرية خاصها شي حرب تحك بنادم راه ضسر و بزاف ، التأثير ديال زبي سافر أنت لست كاليبتوسا ، لا تتزوج اجمع الشقوف و سافر دير و ما ديرش ، و أنا بعدا كيأثر فيا غي لمكناسي و كما يقول الفيلسوف لي بغا يكون حمار يكون غي ما يركلنيش.