الكروصنطريزم و الوصاية على الموجتماع

أهلا مبروك عواشركم سمحو لينا على التعطيلة عاد طلقوني كنت مربوطة مع الشياطين ، و كيفما كتعرفو رمضان شهر مقدس و حرام فيه النميمة و السبان وكدا و لهذا فنحن مستمرون فالنميمة و الخسران و مشكرانش ، أما بعد توالت علينا أخبار التجنديخ و التقرميع في كل مكان ، هاذيك الدرية لي خمجوها شي همج فالطاكسي كتطبيق للشريعة الاسلامية باعتبارها فاسقة تقول هوما سيدي ربي هاد الرباعة ديال المصنين ، و فاش شفتها تفكرت هاديك البنت اللي قرعوا ليها الماركسين  فمكناس و شبعوها عصا حيت قاليك أ سيدي راه خائنة ، بغيت نتلف هاد المصايب حليت تويتر طلع ليا فيديو ديال واحد القندوح كيغلف فبنتو لي عندها سبع سنين بعباية و هي كتبكي و قاليك راه تحجبات بالإرادة ديالها ، يقدرو جماعة الفيمين يبداو ينحطو علينا بحجة أن الضحايا كلهم إناث و لهذا سكتونا تا الذكور واكلين الشحط ، المشكل ماشي فالجنس ولا حتى فالمرجعية سواءا كانت يسارية أو يمينية أو داعشية المشكل فالوصاية لي كيطبقوها كاع المرجعيات على عباد الله ، أقدم معضلة بشرية  قبل النيك هي بنادم مكيديهاش فكرو و صاف ،  زمن النبوة سالا و بنادم مزال متيق راسو خليفة فالناس ، و عارف أش صالح و أش ما صالحش ، راسك غادي غادي يفرعوك سواءا بانجازات محمد ولا ماركس ولا روتبارد .

بنادم مريض فمخو و حاسب راسو أم العريف و من عندو كتفرق ، الإسلامي بغا يحجب كلشي و الفيمن بغاو يعريونا كاملين و بجوج كيخورو كل واحد مسؤول على راسو يدير فيه قرون ولا عشة ، ولكن شي كحل الراس بغا يفصلنا كيفما بغا فينما ضرتي غا تلقى شي وصي معارفوش أصلا فين محطوط و مغادي ينفعك لا بريال لا بأورو لا بسكاتو والو خرزتو حالها و خاشي راسو فتقابي الناس ، بولحية كينحط على المتبرجات وخا الماكياج شراوه بفلوسهم و طلاوه بيديهم و نتا مال أصل مك. و مكرهش يشنقها و يطبق فيها الحد هاد الماركة هوما لي كانو ف 2008 كتدوزي من حداه و كيقوليك حطب جهنم الله يجعلو يتشوا فيها ، غادي تغبر كمارتك من هاد الجيهة غادي تلقا ملحد تقليدي كيغوت تا هو وا العالم الحديث انحط وا مي وا خويا وا بويا الصايات تهزو ، وا كتعومو بالدوبياس وا خفافيتو أ الدريات ضسرتو يالاه فيليندرا طلقي عليهم النمورة ، تلعني الشيطان و تبدلي ساعة بأخرى و تمشي تديري لاسيغ كأيتها نتوة تلاقاي مع شي مونتيف وا كتحيدو الزغب هذا تطبيع مع الباطرياركية و الطوليطارية و الموزمبيق و شعري ليس زائدا، واش سوقك كرعيني هذاك نزوقو بالحمص ولا الزبيب ديها فكرك ، راه تحارب تا تعيا فالتوجهات الفكرية مغيتبدل والو تقضي على الإسلامين و تلغي الوصاية ديالهم يخرجو ليك اليساريين و ابتسام الشكر ، المشكل فالفضول و  لكروصونطريزم  kerocentrisme  زعما التمركز حول الكر و تبقى تشوف راسك حسن من الأخرين و كأنك مركز الكون مما ينتج عنه رؤية الأخرين كمجموعة من القاصرين لي خاص نتا تحدد ليهم كيفاش يعيشو و يموتو ، و إيلا لاحظتو الإعلام راه كلو وصاية ابتداءا من صحاب الطيابات لي كيبقاو يوريك كيفاش خاصك تقطع المعدنوس بالطريقة الصحيحة و كيفهمو من نيتهم  مع انه طالما  الطاجين مغاديش نبيعو ليك و سيادتنا لي غادي نجغددوه نسمو تا بالفراقش سوق مك يالاه؟ تقلب الإذاعة تلقى شي منتوف كيندب لاموض ماشي هكا ها كيفاش خاصكم  تلبسو الشال ، آآ الزمر الشال شنق بيه راسك و روح تقود ، تخرج لزنقة تشم الهوا يوقفك شي واحد فمك مناشفش واش ما صايماش ؟ تطلع درية تخرج ليك جارتك من القبر شكون هادي لي معاك قابط الروح أ الحاجة ظفري الشيب و صقلي ،أ تفو تفو تفو على سلعة و الله يحرق طواسل الفهاماطورين و أنبياء العهد الجديد كيفما كانت المرجعية ديالهم ، القناعات ديالك زيدهم فيك و طبقهم على راسك عيش بيهم فدارك و هنينا ، أنا مكنحلمش بعالم يتعايش فيه الجميع و نخرج نشد فيد عزي من هنا و يد برقوقي من هنا ، القضية و ما فيها قناعاتك و دينك و أحاسيسك خليهم عندك و كل واحد يدخل سوق راسو ، بنادم مقايصك لا فصحة لا فجيب و حاضيه ، راه ماشي بالضرورة نتحابو ولكن ضروري نعطيو لبعضياتنا التيقار لي مكيحتاجش منك شي مجهود إلا يلا كنتي شي صكع  و بيناتنا راه مستحيل نوقرو بعضياتنا مية فالمية لأن الفضول يمنعنا ولكن كل ما نطمح إليه هو شوية ديال التمياك يالاه ميكو الدراري و خودو الشريف الوجدي قدوة و راكم على ز...